सिरहा, १६ माघ । सिरहामा सवारी दुर्घटनामा परि एक मजदुरको मृत्यु भएको छ । मृत्यु हुनेमा कर्जन्हा नगरपालिकाका– ६ बडहराका सुरेश मुखिया रहेको छ ।
जिल्ला प्रहरी कार्यालय सिरहाका डिएसपी बिरेन्द्र पासवानका अनुसार चोहर्वाबाट लहानतर्फ जाँदै गरेको स १ त ३८४४ नम्बरको ट्याक्टर पूर्व–पश्चिम राजमार्ग अन्तरगत धनगढीमाइ नगरपालिका १० स्थित धनगढी चोकमा दुर्घटना हुँदा ट्याक्टरमा सवार कर्जन्हा नगरपालिका–६ बडहरा बस्ने अशेश्वर मुखियाको छोरा सुरेश मुखियाको मृत्यु भएको छ ।
पासवानका अनुसार, ट्याक्टरको टोलीमा सवार रहेका मजदुर उक्त ट्याक्टरको इन्जिन पछाडिको बायाँ चक्का मुनि परेका थिए । उनको शरीरको विभिन्न भागमा चोट लागेको थियो भने उनको उपचारको क्रममा मृत्यु भएको हो ।
शवलाई पोस्टमार्टमाका लागि जिल्ला प्रादेशिक अस्पताल लहान पठाएको छ । प्रहरीले ट्याक्टर र चालकलाई नियन्त्रणमा लिई थप अनुसन्धान गरिरहेको डिएसपी पासवानले बताए ।
