काठमाडौं, ४ मंसिर । प्रधानमन्त्री बालेन्द्र शाहको आसन्न भारत भ्रमणमा नेपाल–भारतबीच ऊर्जा, व्यापार, पारवहन तथा पूर्वाधार विकासमा सहकार्य विस्तारलाई प्राथमिकता दिइने भएको छ।
भारतीय प्रधानमन्त्री नरेन्द्र मोदीको निमन्त्रणामा प्रधानमन्त्री शाह मंसिर ६ र ७ गते दुईदिने राजकीय भ्रमणका लागि भारत जान लागेका हुन्। प्रधानमन्त्री बनेपछि उनको यो पहिलो औपचारिक विदेश भ्रमण हो।
परराष्ट्र मन्त्रालयका अनुसार भ्रमणका क्रममा प्रधानमन्त्री शाहले भारतीय समकक्षी मोदीसँग प्रतिनिधिमण्डलस्तरीय वार्ता गर्नेछन्। वार्तामा व्यापार, लगानी, ऊर्जा, सम्पर्क सञ्जाल र विकास साझेदारीका विषयमा छलफल हुनेछ। साथै शिक्षा, स्वास्थ्य, कृषि, खेलकुद तथा विपद् व्यवस्थापनलगायत क्षेत्रमा विभिन्न समझदारीपत्र आदानप्रदान गर्ने तयारी छ।
भ्रमणका क्रममा नेपाल–भारतबीच सम्पन्न परियोजनाको उद्घाटन तथा नयाँ परियोजनाको शिलान्यास गर्ने कार्यक्रमसमेत रहेको छ।
प्रधानमन्त्री शाहले भारतीय राष्ट्रपति द्रौपदी मुर्मु र विदेशमन्त्री एस जयशंकरसँग शिष्टाचार भेट गर्नेछन्। भारतीय प्रधानमन्त्री मोदीले उनको सम्मानमा दिवाभोज आयोजना गर्ने कार्यक्रम छ।
३४ सदस्यीय सरकारी प्रतिनिधिमण्डलको नेतृत्व गर्दै भारत जाने प्रधानमन्त्रीसँग अर्थमन्त्री डा. स्वर्णिम वाग्ले र परराष्ट्रमन्त्री शिशिर खनाललगायत सहभागी हुनेछन्। निजी क्षेत्रका ५२ जना व्यवसायी पनि आफ्नै खर्चमा भ्रमणमा सहभागी हुनेछन्।
भ्रमणकै क्रममा नेपाल–भारत बिजनेस फोरम आयोजना गरी भारतीय लगानी आकर्षित गर्ने तथा दुई देशका व्यवसायीबीच सहकार्य बढाउने विषयमा छलफल गरिने मन्त्रालयले जनाएको छ।
दुईदिने भ्रमण सम्पन्न गरी प्रधानमन्त्री शाह मंसिर ७ गते साँझ स्वदेश फर्कने कार्यक्रम रहेको छ।













