काठमाडौं, ११ असोज । पूर्वप्रधानन्यायाधीश चोलेन्द्र शम्शेर जबरा पक्राउ परेका छन्।
उनलाई गएराति काठमाडौंको महाराजगञ्जस्थित निवासबाटै अपराध अनुसन्धान कार्यालय टेकुको टोलीले पक्राउ गरेको स्रोतले जनाएको छ।
जबरामाथि कुन कसुरमा पक्राउ गरिएको हो भन्नेबारे भने प्रहरीले औपचारिक जानकारी सार्वजनिक गरेको छैन।
यसअघि २०७८ फागुनमा उनीविरुद्ध संसदमा महाअभियोग प्रस्ताव दर्ता भएपछि जबरा निलम्बनमा परेका थिए। उनीमाथि २१ वटा अभियोग लगाइए पनि तत्कालीन संसदले महाअभियोगको टुंगो लगाउन सकेको थिएन।
जबराले २०७५ पुस १८ गते प्रधानन्यायाधीशको जिम्मेवारी सम्हालेका थिए। कार्यकालका क्रममा विभिन्न विवादमा परेपछि उनीविरुद्ध कानुन व्यवसायीहरूले आन्दोलनसमेत गरेका थिए।
