काठमाडौं, ११ असोज । मनसुनी वायु, पश्चिमी वायु तथा भारतको उत्तर प्रदेश आसपास रहेको न्यूनचापीय क्षेत्रको प्रभावका कारण आज देशका विभिन्न भागमा वर्षाको सम्भावना रहेको छ।
हाल गण्डकी, लुम्बिनी र सुदूरपश्चिमका धेरै स्थानमा तथा बागमती र कर्णालीका केही भागमा हल्कादेखि मध्यम वर्षा भइरहेको छ।
आज कर्णाली र सुदूरपश्चिमका हिमाली तथा पहाडी क्षेत्रमा धेरै स्थानमा चट्याङसहित वर्षा हुने सम्भावना छ। गण्डकी, लुम्बिनी, कोशी र बागमतीका केही पहाडी क्षेत्रमा पनि वर्षा हुनसक्नेछ। सुदूरपश्चिम तथा गण्डकी, लुम्बिनी र कर्णालीका केही स्थानमा भारी वर्षाको सम्भावना रहेको छ।
लुम्बिनी र सुदूरपश्चिमका तराई क्षेत्रमा हावाहुरीसहित वर्षा हुनसक्ने भएकाले सतर्कता अपनाउन आग्रह गरिएको छ। रातिको समयमा पनि विभिन्न प्रदेशका हिमाली तथा पहाडी क्षेत्रमा चट्याङसहित वर्षाको सम्भावना रहेको छ।
