काठमाडौं, ७ साउन l कृषिप्रधान देश नेपालले आर्थिक वर्ष २०८२/८३ मा धान तथा चामल आयातमा ३९ अर्ब ८९ करोड ५८ लाख रुपैयाँ खर्च गरेको छ। भन्सार विभागका अनुसार गत आवमा ७ लाख ४१ हजार ७०३ टन धानचामल आयात भएको हो।
अघिल्लो आर्थिक वर्षको तुलनामा कुल आयात परिमाण र खर्चमा सामान्य कमी आए पनि कच्चा धानको आयात घटेर तयारी चामलको आयात बढेको देखिएको छ। गत आवमा ४ लाख ७७ हजार ९०९ टन धान र २ लाख ६३ हजार ७९४ टन तयारी चामल आयात गरिएको थियो।
तथ्यांकअनुसार नेपालको धानचामल आयातमा भारतको ९९ प्रतिशतभन्दा बढी हिस्सा रहेको छ। अधिकांश धान, मसिनो चामल, बासमती र कनिका भारतबाट आयात गरिएको छ भने चीन, भियतनाम, थाइल्यान्ड र इटालीबाट नगण्य मात्रामा आयात भएको भन्सार विभागले जनाएको छ।
