रसुवा, ३१ असार । आर्थिक वर्ष २०८२–८३ मा रसुवागढी टिमुरे भन्सारबाट ६ हजार ५०० भन्दा बढी विद्युतीय सवारी साधन -ईभी- नेपाल भित्रिएका छन् ।
चिनियाँ ब्रान्डका ईभीप्रतिको बढ्दो आकर्षणका कारण यस नाकाबाट हुने आयातसँगै भन्सार राजश्वमा पनि उल्लेख्य वृद्धि भएको छ ।
रसुवा भन्सार कार्यालयका अनुसार ईभीको जाँचपास तथा भन्सार महसुलबाट मात्रै १५ अर्ब रुपैयाँभन्दा बढी राजश्व सङ्कलन भएको छ, जुन कुल राजश्वको ६० प्रतिशतभन्दा बढी हो ।
सञ्चालन खर्च कम, वातावरणमैत्री र आधुनिक प्रविधिका कारण उपभोक्ताको रोजाइ ईभीतर्फ बढेको कार्यालयको भनाइ छ । यद्यपि, बजेटअघि करिब २०० ईभीको नियमविपरीत पूर्व–जाँचपास गराउन खोजिएको प्रकरणमा तत्कालीन प्रमुख भन्सार अधिकृतसहित १३ कर्मचारीमाथि विभागीय कारबाही गरिएको थियो ।
यसबीच निर्माणाधीन एकीकृत जाँचचौकी -आईसीपी- र सुख्खा बन्दरगाह अन्तिम चरणमा पुगेकाले आगामी आर्थिक वर्षदेखि भन्सार प्रक्रिया र व्यापारिक गतिविधि थप प्रभावकारी हुने अपेक्षा गरिएको छ ।
