काठमाडौं, २७ जेठ । हत्या र डाँका मुद्दामा अदालतबाट दोषी ठहर भई फरार रहेका एक व्यक्ति पक्राउ परेको छ ।
पक्राउ पर्ने व्यक्ति काभ्रेपलाञ्चोकको पाँचखाल नगरपालिका–४ निवासी ३९ वर्षीय कृष्ण मगर रहेको प्रहरीले जनाएको छ । उनलाई काठमाडौं उपत्यका अपराध अनुसन्धान कार्यालयको टोलीले नियन्त्रणमा लिएको हो ।
प्रहरीका अनुसार मगर यसअघि जेनजी आन्दोलनका क्रममा केन्द्रीय कारागार, सुन्धाराबाट फरार भएका थिए । उनीमाथि २०७८ असोज ६ गते सिन्धुपाल्चोकको मेलम्ची नगरपालिका–१० स्थित सिम्लेफाँटमा नेत्रप्रसाद दाहालमाथि कोदालो प्रहार गरी हत्या गरेको आरोप थियो ।
उक्त घटनामा अदालतले २०७९ पुस १८ गते उनलाई २५ वर्ष कैद सजाय सुनाएको थियो । यस्तै, डाँका मुद्दामा पनि अदालतले उनलाई ७ वर्ष कैद तथा ७० हजार रुपैयाँ जरिवानाको फैसला गरेको थियो । पक्राउपछि मगरलाई आवश्यक कानुनी प्रक्रिया पूरा गरी पुनः सुन्धारास्थित केन्द्रीय कारागार पठाइएको प्रहरीले जानकारी दिएको छ ।
