काठमाडौं, १६ जेष्ठ । नेपाली कांग्रेसका सभापति गगन थापाले कांग्रेस प्रतिपक्षमा रहेकाले सरकारका सकारात्मक कामको स्वागत गर्ने र कमजोरीप्रति खबरदारी गर्ने दायित्व रहेको बताएका छन् ।
नेपाल थारु संघको प्रथम महाधिवेशन उद्घाटन समारोहलाई सम्बोधन गर्दै उनले सरकारले ल्याएको बजेटमा अर्थतन्त्रका संरचनागत सुधारका लागि केही सकारात्मक व्यवस्था समेटिएको भन्दै स्वागतयोग्य रहेको बताए ।
तर, सरकारले गरिबी न्यूनीकरणभन्दा गरिबप्रति उदासीन नीति अपनाएको आरोप लगाए । थापाले गरिबी हटाउने नाममा गरिबलाई नै विस्थापित गर्ने मानसिकता देखिएको टिप्पणी गर्दै सामाजिक न्याय, संविधान र कानुनको संरक्षणका लागि कांग्रेस सशक्त प्रतिपक्षको भूमिकामा रहने बताए ।
सरकार संविधान, कानुन र जनहितविपरीत गए कांग्रेस त्यसको विरोधमा उभिने उनको भनाइ थियो ।
