काठमाडौं, १५ जेठ। प्रतिपक्ष दल राजेन्द्र लिङ्देन ले मानव अधिकार आयोगको प्रतिवेदन तत्काल कार्यान्वयन गर्न सरकारसँग आग्रह गरेका छन् ।
राष्ट्रिय प्रजातन्त्र पार्टी (राप्रपा) स्थापना भएको ३६ वर्ष पूरा भएको अवसरमा शुक्रबार काठमाडौंमा आयोजित कार्यक्रममा बोल्दै अध्यक्ष लिङ्देनले आयोगको प्रतिवेदन अत्यन्तै महत्वपूर्ण भएको उल्लेख गर्दै त्यसलाई कार्यान्वयनतर्फ लैजान सरकार गम्भीर हुनुपर्ने बताए ।
उनले मानव अधिकार आयोगले दोषी ठहर गरेका व्यक्तिहरूले पनि आवश्यक कानुनी प्रक्रिया पूरा गरी छिटो सफाइ लिनुपर्ने धारणा राखे । प्रतिवेदन नेपालभित्र मात्रै सीमित नरही संयुक्त राष्ट्रसंघ तथा अन्तर्राष्ट्रिय मानव अधिकारसम्बन्धी निकायहरूको अभिलेखमा समेत रहने भएकाले यसलाई गम्भीर रूपमा लिनुपर्ने उनको भनाइ थियो ।
अध्यक्ष लिङ्देनले विगतमा मानव अधिकार उल्लंघनका आरोपमा दोषी ठहरिएका व्यक्तिहरूलाई विभिन्न देशले विदेश भ्रमणमा रोक लगाएका उदाहरण रहेको उल्लेख गर्दै सरकारले प्रतिवेदन कार्यान्वयनका लागि आवश्यक प्रक्रिया अघि बढाउनुपर्ने बताए ।
त्यस अवसरमा उनले राप्रपा मुलुकको वैकल्पिक राजनीतिक शक्ति भएको दाबी गर्दै पार्टीका नेता–कार्यकर्तालाई निराश नहुन आग्रह समेत गरे ।
