काठमाडौं, १५ जेठ । राष्ट्रपति राम चन्द्र पौडेलले मुलुकमा सुशासन र समृद्धिको जनचाहना पूरा गर्न राज्यसत्ताको चरित्र, आचरण र राजनीतिक निष्ठामा आमूल परिवर्तन आवश्यक रहेको बताएका छन्।
गणतन्त्र दिवस २०८३ का अवसरमा टुँडिखेलमा आयोजित विशेष समारोहलाई सम्बोधन गर्दै उनले राजनीतिक उपलब्धिलाई नागरिकको जीवनस्तरसँग जोड्न शासकीय स्वरूप र राजनीतिक नेतृत्वमा सुधार अपरिहार्य रहेको बताए।
राजनीतिक परिवर्तनले मात्र जनअपेक्षा पूरा नहुने उल्लेख गर्दै उनले दल र नेतृत्वलाई सिर्जनशील, विनयशील तथा जनउत्तरदायी बन्न आग्रह गरे।
राष्ट्रपति पौडेलले बलियो जनादेशसहितको वर्तमान सरकारले सुशासन, सेवा प्रवाह सुधार, आर्थिक पुनरुत्थान तथा भ्रष्टाचारविरुद्ध शून्य सहनशीलताको नीति अघि बढाएकोमा खुशी व्यक्त गर्दै शासकीय सुधारका कार्यक्रम र कानुनी–संरचनागत सुधारले जनतामा नयाँ आशा जगाउने विश्वास व्यक्त गरे।
