काठमाडौं, १४ जेठ । नेपाली कांग्रेसले जेनजी आन्दोलनबारे राष्ट्रिय मानव अधिकार आयोगले सार्वजनिक गरेको प्रतिवेदनमाथि सरकारको आधिकारिक धारणा माग गरेको छ ।
पार्टी प्रवक्ता देवराज चालिसेले विज्ञप्ति जारी गर्दै आयोगको सिफारिसप्रति सरकार जवाफदेही हुनुपर्ने बताएका छन् ।
कांग्रेसले गौरीबहादुर कार्की नेतृत्वको जाँचबुझ आयोगको प्रतिवेदन अधुरो, अपूर्ण र अस्पष्ट रहेको आफ्नो पुरानो धारणा मानव अधिकार आयोगको प्रतिवेदनले थप पुष्टि गरेको दाबी गरेको छ ।
विज्ञप्तिमा मानव अधिकार आयोगले कार्की आयोगकै अध्यक्षमाथि समेत सूक्ष्म अनुसन्धान गर्नुपर्ने उल्लेख गरेको भन्दै सरकारले यस विषयमा तत्काल छानबिन अघि बढाउनुपर्ने माग गरिएको छ ।
