जनकपुर, १४ जेष्ठ । आत्मा, जीवन र मानव अस्तित्वको दार्शनिक पक्षलाई केन्द्रमा राखेर तयार गरिएको ‘तत्म दर्शन’ नामक पुस्तक सार्वजनिक गरिएको छ।
पुस्तकमा आत्माको वास्तविक स्वरूप, जीवनको अर्थ तथा आध्यात्मिक चेतनाबारे विस्तृत व्याख्या गरिएको छ। पुस्तकमा ‘तत्म’ शब्दको शाब्दिक र आध्यात्मिक अर्थ स्पष्ट गर्दै आत्मा नै जीवनको मूल सत्य रहेको उल्लेख गरिएको छ। साथै आत्मा र शरीरबीचको सम्बन्ध, परमात्मासँगको सम्बन्ध तथा आत्मज्ञानको महत्वबारे पनि चर्चा गरिएको छ।
लेखकले भगवद्गीतालगायत धार्मिक ग्रन्थको उदाहरण प्रस्तुत गर्दै आत्मा अमर र अविनाशी रहेको उल्लेख गरेका छन्। पुस्तकमा मानव जीवनमा शान्ति, ध्यान, आत्मपहिचान र मुक्ति प्राप्तिको मार्गबारे समेत व्याख्या गरिएको छ।
दार्शनिक तथा आध्यात्मिक विषयमा रुचि राख्ने पाठकका लागि उपयोगी मानिएको उक्त पुस्तकले समाजमा नैतिकता, सहिष्णुता र आध्यात्मिक चेतनाको विकासमा योगदान पुग्ने विश्वास गरिएको छ।
पुस्तक जेष्ठ २३ गते एक कार्यक्रमको बीच लोकार्पण गरिनेछ ।
