काठमाडौं, ३ जेष्ठ । नेपाल उद्योग वाणिज्य महासंघले आगामी आर्थिक वर्ष २०८३/८४ को बजेट अर्थतन्त्रमा आमूल परिवर्तन ल्याउने गरी प्रस्तुत गर्न अर्थमन्त्री डा.स्वर्णिम वाग्लेलाई सुझाव दिएको छ ।
महासंघले बजेटलाई सामान्य वार्षिक दस्ताबेज नभई आर्थिक रूपान्तरणको अवसरका रूपमा लिन आग्रह गरेको हो । महासंघले खस्किएको व्यावसायिक मनोबल उकास्न, लगानी आकर्षित गर्न, रोजगारी सिर्जना गर्न तथा उत्पादनमुखी अर्थतन्त्र निर्माणका लागि नीतिगत सुधार आवश्यक रहेको जनाएको छ ।
अध्यक्ष अन्जन श्रेष्ठले विप्रेषण र आयातमा आधारित अर्थतन्त्रले दीर्घकालीन समृद्धि नदिने भन्दै कर नीतिको स्थायित्व, एकल राजस्व संहिता र अधिकार सम्पन्न राजस्व बोर्ड गठनको माग गरे ।
अर्थमन्त्री वाग्लेले सरकारले निजी क्षेत्रलाई मुख्य साझेदार मानेर संरचनागत आर्थिक सुधारसहित रूपान्तरणकारी बजेट ल्याउने बताएका छन् ।
महासंघले उच्च कर, घट्दो लगानी, कमजोर औद्योगिक उत्पादन तथा निर्यात प्रवद्र्धनका लागि विशेष नीति आवश्यक रहेको पनि उल्लेख गरेको छ ।
