जनकपुर, ३ जेष्ठ । जनकपुर साहित्य महोत्सव २०८३ को कार्यक्रममा बोल्दै जानकीमन्दिरका छोटे महंत राम रोशन दास वैष्णवले जनकपुरधामको धार्मिक, सांस्कृतिक तथा ऐतिहासिक पहिचान जोगाउन सबै पक्ष गम्भीर हुनुपर्ने बताएका छन्।
उनले जनकपुरको अन्तर्राष्ट्रिय पहिचान जानकीमन्दिरकै कारण स्थापित भएको उल्लेख गर्दै मन्दिर र धार्मिक सम्पदाको संरक्षणमा राज्य तथा स्थानीय सरोकारवालाले विशेष ध्यान दिनुपर्ने बताए।
छोटे महंत वैष्णवले “जनकपुरको पहिचान जानकीमन्दिरले दिएको हो” भन्दै मन्दिर व्यवस्थापनका लागि ट्रस्ट गठन गरिए त्यसमा आफ्नो महत्वपूर्ण भूमिका रहने दाबी गरे।
उनले धार्मिक सम्पत्तिको सही व्यवस्थापन र संरक्षणका लागि पारदर्शी संरचना आवश्यक रहेको धारणा राखे।
उनले जनकपुरधाममा धर्मशालाको नाममा व्यावसायिक होटल सञ्चालन भइरहेको भन्दै चिन्ता व्यक्त गरे। धार्मिक आस्थासँग जोडिएका संरचनाहरूको मौलिक उद्देश्य हराउँदै गएको उनको भनाइ थियो।
कार्यक्रममा उनले जनकपुरधामलाई “साधु–सन्तको धाम” को रूपमा चित्रण गर्दै यो शहरलाई राजनीतिक स्वार्थभन्दा माथि राख्नुपर्ने बताए। “जनकपुरधाम साधु–सन्तको धाम हो, नेताको होइन,” उनले भने। त्यस्तै उनले ऐतिहासिक तथा धार्मिक सम्पदा ५२ कुट्टी र ७२ कुण्डको संरक्षणमा उदासीनता देखिएको भन्दै प्रश्न उठाए।
“५२ कुट्टी, ७२ कुण्ड कहाँ गए ? कसले लग्यो ? जनकपुरलाई यी सम्पदा चाहिन्छ,” भन्दै उनले पुरातात्त्विक तथा धार्मिक संरचनाको संरक्षणका लागि तत्काल पहल गर्न आग्रह गरे।
