काठमाडौं, ३ जेष्ठ । काठमाडौंको चन्द्रागिरि नगरपालिका–३ स्थित थानकोट खरिबोटमा चक्कु प्रहारबाट एक युवकको ज्यान गएको छ ।
प्रहरीका अनुसार महोत्तरीका करिब ३८ वर्षीय समी अहमदले पारिवारिक विवादका क्रममा आफ्नै सालो नाता पर्ने करिब २५ वर्षीय जाकिर मन्सुरीमाथि तरकारी काट्ने चक्कुले आक्रमण गरेका थिए ।
गम्भीर घाइते भएका मन्सुरीलाई उपचारका लागि सतुङ्गलस्थित मेडपोइन्ट अस्पताल पु¥याइएको थियो । तर उपचारकै क्रममा शुक्रबार राति साढे ९ बजे चिकित्सकले उनलाई मृत घोषणा गरेका हुन् ।
घटनामा संलग्न अहमदलाई प्रहरी वृत्त थानकोटले नियन्त्रणमा लिएको जनाएको छ । मृतकको शव परीक्षणका लागि त्रिवि शिक्षण अस्पताल महाराजगञ्ज पठाइएको छ भने घटनाबारे थप अनुसन्धान भइरहेको प्रहरीले जनाएको छ ।
