जनकपुर, २ जेष्ठ । जानकी मन्दिरलाई युनेस्कोको विश्व सम्पदा सूचीमा सूचीकृत गराउने उद्देश्यले जनकपुरधाममा जनकपुरधाम सम्पदा यात्रा आयोजना गरिएको छ ।
शनिबार जानकी मन्दिर प्राङ्गणबाट सुरु भएको यात्रा शहरका विभिन्न धार्मिक तथा ऐतिहासिक सम्पदाको परिक्रमा गर्दै महेन्द्र नारायण निधि मिथिला सांस्कृतिक भवनमा पुगेर सम्पन्न भएको थियो ।
यात्रामा जानकी मन्दिर, पेठिया बजार, रंगभूमि मैदान, रामजानकी विवाह मण्डप, अरगज्जा पोखरी, धनुष सागर, गंगासागर लगायतका सम्पदास्थलहरूमा बाजागाजासहित पदयात्रा गरिएको थियो ।
आयोजकका अनुसार जनकपुरधामको धार्मिक तथा सांस्कृतिक सम्पदाको संरक्षण र जानकी मन्दिरलाई विश्व सम्पदा सूचीमा समावेश गराउने उद्देश्यले कार्यक्रम गरिएको हो।
यात्रामा युवा, विद्यार्थी, संस्कृति संरक्षणकर्मी तथा विभिन्न संघसंस्थाका प्रतिनिधिको सहभागिता रहेको थियो ।
