काठमाडौं, २ जेष्ठ । दैलेखको दुल्लु नगरपालिका–१३ का वडा सचिव कमल भण्डारीलाई प्रधानमन्त्री तथा मन्त्रिपरिषद्को कार्यालयको नाम दुरुपयोग गर्दै फोनमार्फत धम्की दिने युवक पक्राउ परेका छन् ।
पक्राउ पर्नेमा सुर्खेतका २२ वर्षीय प्रकाश खड्का रहेका छन्, जो हाल काठमाडौंको शंखमुलमा बस्दै आएका थिए । जिल्ला प्रहरी परिसर काठमाडौंले उनलाई नियन्त्रणमा लिएको हो ।
प्रधानमन्त्री कार्यालयको नाम प्रयोग गरी राष्ट्रसेवक कर्मचारीलाई धम्की दिने, त्रास सिर्जना गर्ने तथा अश्लील र अमर्यादित भाषा प्रयोग गरेको आरोपमा उनीमाथि अनुसन्धान भइरहेको प्रहरीले जनाएको छ ।
खड्काले वडा सचिवलाई धम्क्याएको अडिओ सामाजिक सञ्जालमा भाइरल भएपछि प्रधानमन्त्री कार्यालयले समेत घटनाबारे चासो देखाउँदै कारबाहीका लागि निर्देशन दिएको थियो ।
