काठमाडौं, १ जेष्ठ । संविधान संशोधनका लागि बहसपत्र तयार गर्न गठित कार्यदलले जेनजी प्रतिनिधिहरूसँग हुने छलफललाई लिएर देखिएको अन्योल हटाउँदै सकारात्मक संवादमा सहभागी हुन आग्रह गरेको छ ।
कार्यदलका संयोजक असिम शाहले सबै सरोकारवालाको सुझाव समेटेर बहसपत्रलाई पूर्णता दिनु नै मुख्य उद्देश्य रहेको बताएका छन् ।
आज साँझ ५ बजे तय गरिएको छलफलअघि केही जेनजी प्रतिनिधिहरूले अघिल्लो सरकारसँग भएका सहमति कार्यान्वयन नभएको भन्दै असन्तुष्टि जनाएपछि शाहले ती सहमति कार्यान्वयनकै चरणमा रहेको र जेनजी परिषद् गठन अन्तिम चरणमा पुगेको स्पष्ट पारे ।
कार्यदलले यो छलफल संविधान संशोधनका लागि सुझाव संकलन गर्ने विशेष उद्देश्यले आयोजना गरिएको भन्दै राजनीतिक विवादभन्दा माथि उठेर सहभागी हुन आग्रह गरेको छ ।
चैत २५ गतेदेखि सुरु भएको छलफलमा कार्यदलले हालसम्म संविधानविद्, पूर्वप्रशासक तथा सञ्चार क्षेत्रका विज्ञहरूसँग परामर्श गरिसकेको जनाएको छ ।
