महोत्तरी, १५ चैत । महोत्तरीको जलेश्वर नगरपालिकाले लामखुट्टेको प्रकोप नियन्त्रण गर्न वडा–वडामा एयर फोगिंग -धुवाँ स्प्रे) अभियान सञ्चालन गरेको छ ।
.गर्मी मौसम सुरु भएसँगै डेंगु, मलेरिया लगायतका सरुवा रोग फैलिन सक्ने जोखिम बढेपछि नगरपालिकाले पूर्वतयारीस्वरूप यो कार्यक्रम सुरु गरेको जनाएको छ ।
नगरपालिकाका अनुसार स्वास्थ्य शाखाको समन्वयमा प्रत्येक वडामा नियमित तालिकाअनुसार फोगिंग स्प्रे गरिँदैछ । विशेष गरी पानी जम्ने स्थान, ढल क्षेत्र, बजार तथा बस्ती आसपासका संवेदनशील क्षेत्रमा प्राथमिकताका साथ औषधि छर्किने काम भइरहेको छ ।
नगरप्रमुख सुरेश साहले लामखुट्टे नियन्त्रणलाई जनस्वास्थ्यसँग प्रत्यक्ष जोडिएको विषय भएकाले यस अभियानलाई प्रभावकारी रूपमा अघि बढाइएको बताए । 
साथै उनले नागरिकलाई घर वरिपरि पानी जम्न नदिन, सरसफाइमा ध्यान दिन र लामखुट्टेबाट बच्ने उपाय अपनाउन आग्रह गरेका छन् । स्थानीय बासिन्दाले पनि नगरपालिकाको यो कदमलाई सकारात्मक रूपमा लिँदै अभियानलाई निरन्तरता दिनुपर्ने बताएका छन् ।
नगरपालिकाले आगामी दिनमा जनचेतनामूलक कार्यक्रमसमेत सञ्चालन गर्ने योजना बनाएको छ ।
