काठमाडौं, १४ चैत । पूर्वप्रधानमन्त्री केपी शर्मा ओलीलाई प्रहरीले गुण्डुस्थित निवासबाट पक्राउ गरी उनकै गाडीमा काठमाडौं प्रहरी परिसर लगेको छ ।
भदौ २३ गतेको जेनजी आन्दोलनका क्रममा १९ जनाको मृत्यु भएको घटनामा संलग्नताको आरोपमा अनुसन्धानका लागि उनलाई पक्राउ गरिएको हो ।
सोही घटनासँग सम्बन्धित भएर तत्कालीन गृहमन्त्री रमेश लेखकलाई पनि भक्तपुरबाट पक्राउ गरिएको छ । जाँचबुझ आयोगको प्रतिवेदन तथा पीडित परिवारको जाहेरीका आधारमा प्रहरीले दुवैलाई मुलुकी अपराध संहिता २०७४ को दफा १८२ अन्तर्गत अनुसन्धान गरिरहेको छ ।
ओलीले पक्राउलाई प्रतिशोधपूर्ण भन्दै कानुनी लडाइँ लड्ने बताएका छन् । नेपालको इतिहासमा पूर्वप्रधानमन्त्री ज्यानसम्बन्धी फौजदारी मुद्दामा पक्राउ परेको यो पहिलो घटना मानिएको छ।
पक्राउपछि उनलाई २४ घण्टाभित्र जिल्ला अदालत काठमाडौंमा पेश गरिनेछ ।
