काठमाडौं, १२ चैत । राष्ट्रिय स्वतन्त्र पार्टी (रास्वपा)का उपाध्यक्ष डा. स्वर्णिम वाग्लेले सांसदको हैसियतमा शासकीय सुधारका लागि इमानदार प्रयास गर्ने प्रतिबद्धता व्यक्त गरेको छ ।
बिहीबार सिंहदरबारमा शपथ ग्रहण गर्न पुगेका बेला सञ्चारकर्मीसँग कुरा गर्दै उनले आफू तनहुँका जनताको अपेक्षाअनुसार काम गर्ने जनाए ।
उनले पार्टीको वाचापत्रलाई मार्गदर्शनका रूपमा लिएर अघि बढ्ने उल्लेख गर्दै सुधारमुखी काममा केन्द्रित रहने जनाउको छ ।
वाग्लेले तनहुँका मतदाताले दिएको विश्वासलाई सम्मान गर्दै सुशासन, विकास निर्माण र समृद्धिका लक्ष्य पूरा गर्न सक्रिय रहने धारणा राखेको छ ।
तनहुँका नागरिकको चाहना र अपेक्षालाई प्राथमिकतामा राख्दै काम गर्ने उनको भनाइ थियो। साथै, अर्थमन्त्री बन्ने सम्भावनाबारे सोधिएको प्रश्नमा उनले कुनै प्रतिक्रिया दिएनन् ।
