काठमाडौं, ११ चैत । नवनिर्वाचित प्रतिनिधिसभाका २७४ सांसदमध्ये ४७ जनाले नेपालीबाहेक १७ वटा मातृभाषामा शपथ लिने तयारी गरेका छन् ।
संसद् सचिवालयका अनुसार सम्बन्धित सांसदहरूले समयसीमाभित्र जानकारी गराएपछि यो व्यवस्था गरिएको हो । भोलि -चैत १२ गते) दिउँसो २ बजे सबै सांसदलाई ज्येष्ठ सदस्य अर्जुननरसिंह केसीले पद तथा गोपनीयताको शपथ गराउनेछन् ।
संविधानअनुसार सांसदहरूले पहिलो बैठकअघि शपथ लिनुपर्ने प्रावधान छ, जसअनुसार मातृभाषामा पनि शपथ लिन पाउने व्यवस्था रहेको छ ।
विभिन्न भाषाहरू-मैथिली, नेपाल भाषा, डोटेली, भोजपुरी, थारू, मगही, तामाङ लगायतमा शपथ लिने तयारी गरिएको छ ।
