काठमाडौं, २ चैत । सरकारले खाना पकाउने ग्यासमा बढ्दो निर्भरता घटाउन विद्युतीय चुलो (इन्डक्सन) प्रवर्धन गर्ने योजना अघि सारेको छ ।
मुख्य सचिव सुमनराज अर्यालको अध्यक्षतामा बसेको केन्द्रीय अनुगमन तथा मूल्याङ्कन समितिको बैठकले विद्युतीय चुलो प्रयोगकर्तालाई विद्युत् महसुलमा सहुलियत दिने कार्ययोजना बनाउन निर्देशन दिएको हो ।
बैठकले घरायसी प्रयोजनका लागि विद्युतीय चुलो खरिदमा प्रोत्साहन गर्ने तथा पुराना विद्युत् प्रणाली स्तरोन्नति गर्ने निर्णय गरेको छ ।
साथै होटल, रेस्टुरेन्ट, छात्रावास र सुरक्षा निकायका ब्यारेकमा ग्यासको सट्टा विद्युतीय ऊर्जा र बायोग्यास प्रयोग बढाउन प्रोत्साहन गरिनेछ ।
सरकारले ग्यासको अस्वाभाविक भण्डारण रोक्न, विक्रेताको नियमित अनुगमन गर्न र माग–आपूर्ति सन्तुलन मिलाउन नेपाल आयल निगमलाई सक्रिय बनाउन पनि निर्देशन दिएको छ ।
