जनकपुर, १८ माघ । धनुषा निर्वाचन क्षेत्र नं ४ मा नेपाली कांग्रेसको आयोजनामा युवाहरूको भेला सम्पन्न भएको छ ।
भेलामा आगामी प्रतिनिधिसभा निर्वाचनलाई लक्षित गर्दै कांग्रेसका उम्मेदवार तथा सहमहामन्त्री महेन्द्र यादवका चुनावी एजेन्डा र कार्यक्रमबारे विस्तृत छलफल गरिएको थियो ।
धनुषा क्षेत्रीय सभापति कुमरकान्त झाको अध्यक्षतामा सम्पन्न भेलामा क्षेत्रभित्रका ४२ वटै वडाबाट तीन सयभन्दा बढी युवाहरूको उल्लेखनीय सहभागिता रहेको थियो ।
भेलामा सहभागी युवाहरूले रोजगारी, शिक्षा, कृषि, पूर्वाधार विकास तथा सुशासनका विषयमा आफ्ना सुझाव राखेका थिए । युवा नेता विदान्त झाले युवाहरूको उत्साहजनक सहभागिताले कांग्रेसप्रति जनसमर्थन बलियो रहेको संकेत गरेको बताए ।
उनले युवाहरूलाई संगठित गर्दै घरदैलो अभियानलाई थप प्रभावकारी बनाइने जानकारी दिए । भेलाले निर्वाचनमा कांग्रेस उम्मेदवार महेन्द्र यादवलाई विजयी गराउने संकल्पसमेत व्यक्त गरेको छ ।
