जनकपुर, १४ माघ । धनुषा क्षेत्र नं. ३ का प्रतिनिधिसभा उम्मेदवार तथा नेपाली कांग्रेसका प्रभावशाली नेता बिमलेन्द्र निधिसँग टेलिभिजन अन्तरवार्ता गरिएको छ ।
कार्यक्रम प्रस्तोता प्रवेश साहले सञ्चालन गरेको अन्तरवार्तामा निधिले आफ्नो चुनावी अनुभव, विगतका काम र आगामी योजना स्पष्ट रूपमा प्रस्तुत गरे ।
अन्तरवार्ताका क्रममा निधिले आफूले धनुषा क्षेत्र नं. ३ बाट पाँच पटक निर्वाचन लडेको स्मरण गराउँदै तीन पटक विजयी र दुई पटक पराजित भएको बताए ।
उनले चुनावी जित–हारलाई स्वाभाविक प्रक्रिया भन्दै जनताको विश्वास नै आफ्नो मुख्य पूँजी भएको उल्लेख गरे । निधिले आफ्नो कार्यकालमा क्षेत्रमा उल्लेखनीय विकासका काम भएको दाबी गरे ।
उनका अनुसार क्षेत्रभित्र सिक्स लेन सडक निर्माण, गाउँ–गाउँमा पक्की सडक विस्तार तथा विभिन्न पूर्वाधार विकासका योजनाहरू सफलतापूर्वक सम्पन्न भएका छन् ।
यी योजनाले क्षेत्रको आवागमन, व्यापार र समग्र जीवनशैलीमा सकारात्मक परिवर्तन ल्याएको उनले बताए । आगामी फागुन २१ गते हुने प्रतिनिधिसभा निर्वाचनमा पुनः विजयी भएमा स्वास्थ्य क्षेत्रलाई प्राथमिकतामा राख्ने निधिको प्रतिबद्धता छ ।
उनले क्षेत्रमै एक अत्याधुनिक प्रसूति अस्पताल र तीनवटा बाल अस्पताल सञ्चालनमा ल्याउने योजना सार्वजनिक गरे । यसले स्थानीयलाई गुणस्तरीय स्वास्थ्य सेवा सहज रूपमा उपलब्ध हुने उनको भनाइ छ ।
निधिले आफू विकास गरेर देखाउने राजनीतिमा विश्वास गर्ने नेता भएको उल्लेख गर्दै जनताको समर्थनका आधारमा आगामी दिनमा पनि धनुषा–३ को समग्र विकासका लागि निरन्तर लागिरहने प्रतिबद्धता व्यक्त गरे ।
