काठमाडौं, ८ माघ । निर्वाचन आयोगले फागुन २१ गते हुने प्रतिनिधिसभा निर्वाचनका लागि फागुनको पहिलो हप्ताभित्र देशभर सबै स्थानमा मतपत्र पु¥याइसक्ने जनाएको छ ।
माघ ९ गते उम्मेदवारलाई निर्वाचन चिन्ह प्रदान गरिएपछि प्रत्यक्षतर्फको मतपत्र छपाइ सुरु भई माघभित्रै सम्पन्न गरिनेछ । समानुपातिकतर्फ अधिकांश मतपत्र छपाइ सकिएको छ भने बाँकी अन्तिम चरणमा छन्।
निर्वाचनका लागि आवश्यक सामग्रीमध्ये अधिकांश जिल्ला तहबाटै खरिद गरिने र बाँकी माघको तेस्रो हप्ताभित्र प्राप्त गरिने आयोगले जनाएको छ ।
आयोगले गलत सूचना नियन्त्रणका लागि पनि निरन्तर काम गरिरहेको बताएको छ । यस निर्वाचनका लागि कुल ३ हजार ४ सय ८७ उम्मेदवारी दर्ता भएका छन् ।
