काठमाडौं, ६ माघ । नेकपा एमालेका नेता तथा पूर्व सांसद बृजेश कुमार गुप्ताले एमाले परित्याग गर्दै नेपाली कम्युनिस्ट पार्टी (नेकपा) बाट प्रतिनिधिसभा सदस्यमा उम्मेदवारी दर्ता गरेका छन् ।
उनले कपिलवस्तु निर्वाचन क्षेत्र नम्बर २ बाट नेकपाको चुनाव चिन्ह ‘तारा’ लिएर उम्मेदवारी दिएका हुन् । गुप्ताले निर्वाचन अधिकृतको कार्यालयमा पुगेर मनोनयन दर्ता गराएका हुन् ।
उनको प्रस्तावकमा धर्मबहादुरलाल श्रीवास्तव र समर्थकमा रामदास चौधरी रहेका छन् । इन्जिनियरको स्थायी जागिर त्यागेर २०५६ सालदेखि सक्रिय राजनीतिमा लागेका गुप्ताले कपिलवस्तुबाट चारपटक संघीय सांसदको निर्वाचन जितिसकेका छन् । उनले आफ्नो राजनीतिक यात्रा राप्रपाबाट सुरु गरेका थिए ।
त्यसपछि तराई मधेश लोकतान्त्रिक पार्टी (तमलोपा) हुँदै नेकपा एमालेमा सक्रिय रहे । पछिल्लो समय एमाले छोडेर उनले नेपाली कम्युनिस्ट पार्टी रोजेका हुन् ।
संसदीय अभिलेखअनुसार गुप्ताले २०५६ सालमा प्रतिनिधिसभा सदस्यको निर्वाचन जितेका थिए । २०६४ सालको संविधानसभा निर्वाचनमा उनले तत्कालीन तमलोपाबाट कपिलवस्तु–३ मा विजय हासिल गरे।
त्यसपछि संविधानसभामा तमलोपाको संसदीय दलको प्रमुख सचेतकको जिम्मेवारीसमेत सम्हालेका थिए । उनको दल परिवर्तन र उम्मेदवारीले कपिलवस्तु–२ को चुनावी प्रतिस्पर्धा थप रोचक बन्ने अपेक्षा गरिएको छ ।
