जनकपुर, ५ माघ । राष्ट्रिय स्वतन्त्र पार्टी (रास्वपा) का नेता बालेन शाहले मिथिलाको पर्यटन सम्भावना राज्यले बेवास्ता गरेको आरोप लगाएका छन् ।
जनकपुरमा आयोजित परिवर्तन उद्घोष कार्यक्रममा उनले राम–जानकी विवाहस्थल हुँदाहुँदै पनि मिथिलामा ‘डेस्टिनेशन वेडिङ’ विकास नहुनु सरकारको गलत नीतिको परिणाम भएको बताए ।
बालेनले आफू भाषणभन्दा काममा विश्वास गर्ने नेता भएको उल्लेख गर्दै प्रदेश संरचनालाई अझ बलियो बनाउनुपर्नेमा जोड दिए । जनकपुर प्रदेशको राजधानी हुँदाहुँदै पनि प्रशासनिक कामका लागि काठमाडौं धाउनुपर्ने अवस्थाप्रति असन्तुष्टि जनाउँदै उनले अधिकार प्रदेशमै सुनिश्चित हुनुपर्ने बताए ।
साथै, काठमाडौं महानगरमा लागू गरिएको छात्रवृत्ति, निःशुल्क उपचारजस्ता कार्यक्रमलाई वास्तविक समाजवादको उदाहरण भन्दै त्यही मोडेल सातै प्रदेश र पालिकामा विस्तार हुनुपर्ने धारणा राखे ।
