काठमाडौँ, ३ माघ । आसन्न प्रतिनिधिसभा सदस्य निर्वाचनको तयारीबारे गृहमन्त्री ओमप्रकाश अर्याल र निर्वाचन आयोगका पदाधिकारीबीच छलफल भएको छ ।
आयोगको कार्यालय बहादुर भवनमा भएको छलफलमा स्वीकृत कार्यतालिकाअनुसार निर्वाचनका कामहरू नियमित रूपमा अघि बढिरहेको जानकारी दिइयो ।
कार्यवाहक प्रमुख निर्वाचन आयुक्त रामप्रसाद भण्डारीले निर्वाचन अधिकृतका कार्यालय स्थापना भइसकेको र करिब ८० प्रतिशतभन्दा बढी तयारी सम्पन्न भएको बताए ।
उनले माघ ११ गते हुने राष्ट्रियसभा सदस्य निर्वाचन र आचारसंहिता पालनाका लागि सूक्ष्म अनुगमन गरिने जानकारी पनि दिए ।
गृहमन्त्री अर्यालले निर्वाचन तयारीदेखि मतगणनासम्म एकीकृत सुरक्षा योजनाअनुसार सरकार पूर्ण तयारी अवस्थामा रहेको स्पष्ट पार्दै आयोगसँग आवश्यक समन्वय गरिने बताए।
यसैबीच आयोगका सचिव कृष्णबहादुर राउतले राष्ट्रियसभा निर्वाचनका लागि मतपत्र छपाइ सकिएको जानकारी दिए ।
