जनकपुर, ३ माघ । मधेश प्रदेशको नामकरण र राजधानी जनकपुरधाम तोकिएको ऐतिहासिक तथा स्मरणीय दिवसको अवसरमा मधेश प्रदेश सभा परिसरमा वृक्षारोपण कार्यक्रम सम्पन्न भएको छ ।
सदियौँदेखि शोषित, पीडित अवस्थामा रहेको मधेशको पहिचान र सम्मान स्थापना भएको दिनको स्मरणमा कार्यक्रम आयोजना गरिएको हो ।
मधेश प्रदेश सभाका सभामुख रामअशिष यादवको विशेष उपस्थितिमा सम्पन्न कार्यक्रममा मधेश प्रदेशका प्रथम सभामुख तथा पूर्वमुख्यमन्त्री सरोजकुमार यादव, अर्थमन्त्री महेशप्रसाद यादव, श्रम तथा यातायात मन्त्री मनिषकुमार सुमनलगायत उच्च राजनीतिक नेतृत्वको सहभागिता रहेको थियो ।
कार्यक्रममा नेकपा (माओवादी केन्द्र)का उपनेता युवराज भट्टराई, नेकपा (एमाले)का प्रमुख सचेतक हरिनारायण महतो, नेपाली कांग्रेसका प्रमुख सचेतक कुमरकान्त झा, जनमत पार्टीका प्रमुख सचेतक चन्दनकुमार सिंह, जसपा नेपालका सचेतक ममता मण्डल सहभागी थिए ।
साथै महिला विकास तथा सामाजिक न्याय संसदीय समितिकी सभापति रुपा यादव, अर्थ तथा योजना समितिकी सभापति अनिता साह, प्राकृतिक स्रोत व्यवस्थापन समितिकी सभापति सारदा दास पहाडी, प्रदेश सभा सचिव बासु प्रसाद कोइराला, पूर्व सचिव रञ्जित यादव, प्रदेश सभा सदस्यहरू तथा सचिवालयका कर्मचारीहरूको उल्लेखनीय उपस्थिति रहेको थियो ।
मधेश प्रदेश सभा सचिवालयका अनुसार २०७८ साल माघ ३ गते मधेश प्रदेशको नामकरण र राजधानी जनकपुरधाम तय भएको गौरवपूर्ण ऐतिहासिक दिनको स्मरण गर्दै वातावरण संरक्षण, हरियाली प्रवद्र्धन र भावी पुस्ताप्रति उत्तरदायित्वको सन्देश दिन वृक्षारोपण कार्यक्रम आयोजना गरिएको हो ।
