काठमाडौं, ३ माघ। भक्तपुरको मध्यपुर ठिमी–३, तेर्सेटारमा शुक्रबार एक दर्दनाक पारिवारिक घटना भएको छ।
डिप्रेसनका बिरामी एक युवकले आफ्नै आमाको धारिलो हतियार प्रहार गरी हत्या गरेका छन्। घटनामा धनुषाको मिथिला नगरपालिका–११ स्थायी घर भई हाल मध्यपुर ठिमीमा डेरा गरी बस्दै आएकी ५० वर्षीया सरिता भण्डारीको मृत्यु भएको छ।
भक्तपुर प्रहरीका प्रवक्ता डीएसपी प्रकाश जवेगुले मृतक भण्डारीको हत्या उनकै २७ वर्षीय छोरा प्रवीण भण्डारीले गरेको पुष्टि गरे। उनका अनुसार प्रवीण लामो समयदेखि डिप्रेसनको उपचाररत थिए।
आमा–छोरा नारायण बोहराको तीनतले घरको पहिलो तलामा डेरा गरी बस्दै आएका थिए।
प्रहरीका अनुसार भण्डारीको घाँटीको बायाँ भाग र टाउकोमा धारिलो हतियारले गहिरो चोट लागेको थियो, जसका कारण घटनास्थलमै उनको मृत्यु भएको हो।
आमाको हत्या गरेपछि प्रवीणले आफ्नै टाउकोमा समेत धारिलो हतियार प्रहार गरेका थिए। गम्भीर घाइते अवस्थामा उनलाई तत्काल अस्पताल लगिएको र हाल उपचार भइरहेको प्रहरीले जनाएको छ।
घटनाबारे थप अनुसन्धान भइरहेको र घटनास्थलबाट प्रमाण संकलन गरिएको प्रहरीले जानकारी दिएको छ।
