काठमाडौँ, २ माघ । काठमाडौँ महानगरपालिकाका प्रमुख तथा रास्वपा नेता बालेन शाहले देशको विकासका लागि लोकप्रिय नाराभन्दा इमानदार नेतृत्व र दीर्घकालीन दृष्टिकोण आवश्यक रहेको बताएका छन्।
२७ औँ भूकम्प सुरक्षा दिवसका अवसरमा सामाजिक सञ्जालमार्फत धारणा सार्वजनिक गर्दै उनले राष्ट्र निर्माणको नयाँ यात्रामा अघि बढ्ने संकेत दिएका हुन्।
२०७२ को भूकम्पपछि सिभिल इन्जिनियरका रूपमा देशका ३५ भन्दा बढी जिल्लामा काम गरेको अनुभव स्मरण गर्दै उनले सुरक्षित र दिगो राष्ट्र निर्माणका लागि संरचनागत सुधार, जिम्मेवार नीति र जनविश्वास जित्ने शासन आवश्यक रहेको बताए।
महानगरपालिकामा शब्दभन्दा कामलाई प्राथमिकता दिएको उल्लेख गर्दै उनले स्थानीय तहबाट सुरु भएका सुधारलाई अब राष्ट्रिय स्तरमा विस्तार गर्ने समय आएको धारणा राखे।
झापा–५ बाट उपनिर्वाचन लड्ने चर्चाबीच उनले यस अभियानलाई सुरक्षित भविष्य चाहने सबै नेपालीको साझा प्रयासका रूपमा प्रस्तुत गरेका छन्।
