काठमाडौँ, १ माघ । जनता समाजवादी पार्टी नेपाल (जसपा) ले माघ ५ गते प्रत्येक संसदीय निर्वाचन क्षेत्रमा ‘बलिदानी दिवस’ मनाउने निर्णय गरेको छ ।
बिहीबार बालकुमारीस्थित पार्टी कार्यालयमा बसेको केन्द्रीय समन्वय समितिको प्रथम बैठकले मधेस आन्दोलन, लोकतान्त्रिक सङ्घर्ष तथा सङ्घीयता र समावेशीताका लागि बलिदान दिएका शहीदहरूको स्मरणमा देशभर विविध कार्यक्रम आयोजना गर्ने निर्णय गरेको हो ।
बैठकले माघ ३ गते मधेस भवनमा प्रदेश स्थापना दिवस मनाउने तथा सो अवसरमा सङ्घीयता, प्रदेश अधिकार र मधेस आन्दोलनका उपलब्धिमाथि केन्द्रित विशेष कार्यक्रम गर्ने निर्णय पनि गरेको छ ।
यसैगरी, केन्द्रीय समन्वय समितिमा पाँच नयाँ सदस्य थप गर्दै राजकिशोर यादव, शैलेन्द्र प्रसाद साह, हरि मण्डल, प्रदीप यादव र जयप्रकाश ठाकुरलाई चयन गरिएको छ ।
आगामी राष्ट्रिय सभाको निर्वाचन व्यवस्थापनका लागि तीन सदस्यीय समिति गठन गरिएको छ, जसमा खालिद सिद्दिकी, परमेश्वर साह र लालकिशोर साह रहनेछन् ।
एकीकरणपछि बसेको पहिलो औपचारिक बैठकले पार्टी सङ्गठनलाई सुदृढ र सक्रिय बनाउँदै जसपा नेपाललाई राष्ट्रिय राजनीतिक शक्तिका रूपमा स्थापित गर्ने प्रतिबद्धता दोहो¥याएको छ ।
