काठमाडौं, १ माघ । नेकपा एमाले अध्यक्ष केपी शर्मा ओलीले नेपाली कांग्रेसभित्र देखिएको पछिल्लो अवस्था आफ्नो पार्टीमा पनि सिर्जना गर्न खोजिएको दाबी गरेका छन् ।
बिहीबार ४२औँ पिस्कर सहिद स्मृति दिवस तथा जेलभित्रका संघर्ष पुस्तक लोकार्पण समारोहमा बोल्दै ओलीले एक वर्षअघि नै महाधिवेशन गरेर भ्रम चिरेको र पार्टीलाई संकटबाट जोगाएको बताए ।
कांग्रेसमा जस्तै बलजफ्ती निष्कासनको प्रयास एमालेमा पनि भएको तर महाधिवेशनमार्फत त्यसलाई टुंग्याइएको उनको भनाइ छ ।
ओलीले पार्टीलाई विभाजन गर्ने षड्यन्त्र असफल भएको दाबी गर्दै एमाले अहिले एक ढिक्का रहेको र सफलताका बेला पार्टीलाई अप्ठ्यारोमा पार्ने प्रयास हुँदै आएको आरोप लगाए ।
