काठमाडौँ, १ माघ । राष्ट्रिय स्वतन्त्र पार्टी (रास्वपा) ले मधेस प्रदेशबाट ‘परिवर्तनको यात्रा’ शुभारम्भ गर्ने घोषणा गरेको छ ।
पार्टीका प्रवक्ता मनिष झाले मधेसलाई केन्द्र बनाएर राष्ट्रिय राजनीतिमा नयाँ सन्देश दिने उद्देश्यसहित अभियान सुरु गर्न लागिएको बताएका छन् ।
बिहीवार पार्टी केन्द्रीय कार्यालयमा आयोजित पत्रकार सम्मेलनमा बोल्दै प्रवक्ता झाले माघ ५ गते जनकपुरबाट राजनीतिक सभा आयोजना गरिने जानकारी दिए ।
उक्त सभामार्फत रास्वपाको परिवर्तन अभियान औपचारिक रूपमा सुरु हुने उनले बताए । सभाको व्यवस्थापन, जनसहभागिता र प्रचार–प्रसारका विषयमा अहिले तीव्र तयारी भइरहेको पनि झाले स्पष्ट पारे ।
उनका अनुसार, जनकपुरमा हुने सभालाई पार्टी सभापति रवि लामिछाने र नेता बालेन्द्र साह (बालेन) ले सम्बोधन गर्नेछन् । प्रवक्ता झाले रास्वपाले आगामी निर्वाचनलाई लक्षित गर्दै बालेन्द्र साहलाई भावी प्रधानमन्त्रीका रूपमा प्रस्ताव गर्ने निर्णयसमेत गरिसकेको जानकारी दिए ।
यस निर्णयले वैकल्पिक राजनीतिक शक्तिको रूपमा पार्टीलाई अझ मजबुत बनाउने र जनतामा नयाँ आशा जगाउने विश्वास रास्वपाको छ ।
मधेस प्रदेशबाट अभियान सुरु गर्नुको कारणबारे बोल्दै झाले मधेसको विकास, समावेशिता र सुशासनका मुद्दालाई राष्ट्रिय बहसको केन्द्रमा ल्याउन पार्टी प्रतिबद्ध रहेको बताए ।
