सुर्खेत, २९ पुस । रोजगारीका सिलसिलामा भारत गएका सल्यानका दुई परिवारका ९ जनाको आगलागीमा परी मृत्यु भएको छ ।
मृत्यु हुनेमा सल्यान शिद्धकुमाख गाउँपालिका–२ टाकुराका दुई परिवारका सदस्यहरू छन् । मृत्यु हुनेमा स्थानीय धन बहादुर विक, कविता विक, राधा विक, रेनुका विक, राजन विक, काशिरम कामी, अनु विक, टिका विक र किरण विक रहेको वडाका वडाध्यक्ष मेक बहादुर बुढाथोकीले बताए ।
उनीहरू रोजगारीको सिलसिलामा भारतको हिमाञ्चल प्रदेशको सोलोन जिल्लाको अर्की भन्ने बजारमा काम गर्थे, पुस २७ गते उनीहरू आगलागीमा परेर मृत्यु भएको वडाध्यक्ष बुढाथोकीले जानकारी दिए ।
यद्यपि आगलागीको कारण भने नखुलेको वडाध्यक्षले बताए । आफ्ना नागरिकको मृत्यु भएपछि वडा कार्यालयले मंगलबार शोक बिदा घोषणा गरेको छ ।
