काठमाडौं, ६ पोष । प्रतिनिधि सभा निर्वाचनअन्तर्गत समानुपातिकतर्फको उम्मेदवार बन्दसूची बुझाउने समय आउन अब एक साता बाँकी छ ।
दलहरूले यही पुस १३ र १४ गते समानुपातिक उम्मेदवारको बन्दसूची निर्वाचन आयोगमा पेस गर्नुपर्नेछ । यसपटक समानुपातिक समावेशी कोटा २०७८ सालको जनगणनाअनुसार निर्धारण गरिएको छ ।
सरकारले अध्यादेशमार्फत निर्वाचन ऐन संशोधन गरेपछि नयाँ जनगणनाका आधारमा कोटा लागू गरिएको हो । यसअघि २०७९ को निर्वाचनमा २०६८ सालको जनगणनाअनुसार कोटा निर्धारण गरिएको थियो ।
निर्वाचन आयोगका अनुसार ११० समानुपातिक सिटका लागि दलहरूले खसआर्य ३३, आदिवासी जनजाति ३२, मधेशी १८, दलित १५, थारू ७ र मुस्लिम समुदायबाट ५ जनाको नाम बन्दसूचीमा समावेश गर्नुपर्नेछ। कुल उम्मेदवारमध्ये ५० प्रतिशत महिला अनिवार्य गरिएको छ ।
समानुपातिक प्रणालीमा भाग लिन १०० राजनीतिक दलले निवेदन दिएका छन् । प्रारम्भिक बन्दसूची माघ ४ गते प्रकाशित हुनेछ भने दाबी–विरोधपछि अन्तिम सूची माघ अन्तिम साता सार्वजनिक गरिनेछ ।
प्रतिनिधि सभाका कुल २७५ सदस्यमध्ये १६५ प्रत्यक्ष र ११० समानुपातिक प्रणालीबाट चयन हुनेछन्। प्रत्यक्षतर्फको उम्मेदवारी मनोनयन माघ ६ गते हुने तालिका छ ।
