विराटनगर, ६ पुस । विराटनगरस्थित नोबेल मेडिकल कलेज शिक्षण अस्पतालको भवनबाट खसेर एक जना इन्टर्न डाक्टरको मृत्यु भएको छ ।
मृत्यु हुनेमा सप्तरी जिल्लाको राजविराज नगरपालिका–९, जगदरी निवासी डाक्टर अमित यादव रहेका छन् । प्रहरीका अनुसार आइतबार बिहान अस्पतालको मुख्य गेटतर्फ रहेको भवनको पाँचौँ तलाबाट खसेर यादव गम्भीर घाइते भएका थिए ।
भवनबाट भूइँमा खस्दा उनको टाउकोमा गम्भीर चोट लागेको थियो । घटनापछि उनलाई तत्काल सोही अस्पतालको आकस्मिक कक्षमा लगेर उपचार सुरु गरिएको थियो ।
चिकित्सकहरूको प्रयासका बाबजुद उपचारकै क्रममा उनको मृत्यु भएको अस्पताल स्रोतले जनाएको छ । डाक्टर यादव नोबेल मेडिकल कलेजमा इन्टर्नका रूपमा कार्यरत थिए ।
घटनाको कारण खुल्न बाँकी रहेको र घटनास्थलको प्रकृति तथा अवस्थाबारे थप अनुसन्धान भइरहेको प्रहरीले जनाएको छ ।
