जनकपुर, ५ पुस । मधेश प्रदेश सभामा रिक्त रहेको सभामुख पदका लागि शनिवार दुई जनाले उम्मेदवारी दर्ता गराएका छन् ।
प्रदेश सभाले सार्वजनिक गरेको निर्वाचन कार्यतालिका अनुसार आइतबार सभामुखको निर्वाचन हुने भएको हो । सभामुख पदका लागि सात दलको तर्फबाट जनता समाजवादी पार्टी (जसपा) का रामअशिष यादवले उम्मेदवारी दर्ता गराएका छन् ।
यादवको प्रस्तावकमा नेपाली कांग्रेसका प्रदेश सभा सदस्य वीरेन्द्र कुमार सिंह रहेका छन् भने समर्थकमा नेकपा माओवादी केन्द्रका फकिरा महतो रहेका छन् ।
यादवले मधेश प्रदेश सभामा प्रतिनिधित्व गर्ने सात दलको समर्थनसहित उम्मेदवारी दर्ता गराएका हुन् । यता, प्रमुख प्रतिपक्षी दल नेकपा एमालेको तर्फबाट त्रिलोकी प्रसादले सभामुख पदका लागि उम्मेदवारी दिएका छन् ।
प्रसादको प्रस्तावकमा जयचन्द्र प्रसाद पटेल रहेका छन् भने समर्थकमा शारदा देवी थापा रहेकी छन् । एमालेले आफ्नै दलको उम्मेदवार अघि सारेसँगै सभामुख पदमा प्रतिस्पर्धा रोचक हुने देखिएको छ ।
यसअघि मधेश प्रदेश सभाका सभामुख रामचन्द्र मण्डलविरुद्ध पदअनुकूल आचरण नगरेको आरोपसहितको प्रस्ताव दुई तिहाइ बहुमतले पारित भएपछि उनी सभामुख पदबाट मुक्त भएका थिए ।
