जनकपुर, ५ पुस । मधेस प्रदेशको सभामुख पदका लागि रामआशिष यादवको नाममा सत्तारुढ दलहरूबीच सहमति जुटेको छ ।
मधेस प्रदेशमा सरकारमा सहभागी दलहरूको संयुक्त बैठकले सभामुखका रूपमा यादवलाई अघि सार्ने निर्णय गरेको हो । पूर्व मुख्यमन्त्री तथा जनता समाजवादी पार्टी (जसपा) नेपालको संसदीय दलका नेता सरोज यादवले सभामुखका लागि रामआशिष यादवको नाम टुंगो लागेको जानकारी दिएका छन् ।
उनका अनुसार सत्तारुढ गठबन्धनभित्र छलफलपछि सर्वसम्मत रूपमा यादवको नाममा सहमति बनेको हो । रामआशिष यादव जसपा नेपालका प्रदेशसभा सांसद हुन् ।
उनी मधेस प्रदेशको राजनीतिमा सक्रिय तथा अनुभवी नेताका रूपमा परिचित छन् । सत्तारुढ दलहरूको सहमतिसँगै सभामुख निर्वाचन प्रक्रिया औपचारिक रूपमा अघि बढेको छ ।
निर्वाचन तालिकाअनुसार मधेस प्रदेशसभाको सभामुख निर्वाचन आइतबार हुने तय भएको छ । त्यसका लागि आज बिहान ११ बजेदेखि दिउँसो ३ बजेसम्म प्रदेशसभा सचिवालय, जनकपुरमा उम्मेदवारी दर्ता हुने कार्यक्रम रहेको छ ।
निर्धारित समयभित्र उम्मेदवारी दर्ता भएपछि आवश्यक प्रक्रिया पूरा गरी मतदान हुने प्रदेशसभा सचिवालयले जनाएको छ ।
