काठमाडौं, ४ पुस । जिल्ला कारागार कार्यालय कञ्चनपुरमा कैदीबन्दीबीच विवाद भएपछि तनावको अवस्था सिर्जना भएको छ ।
कारागारभित्र रहेका दुई समूहका कैदीबन्दीबीच आपसी विवाद चर्किँदै जाँदा स्थिति तनावपूर्ण बनेको हो । तनाव उत्पन्न भएको भन्ने सूचना प्राप्त भएपछि स्थिति नियन्त्रणमा लिनका लागि थप प्रहरी परिचालन गरिएको जिल्ला प्रहरी कार्यालय कञ्चनपुरका प्रहरी उपरीक्षक (एसपी) खडकबहादुर खत्रीले जानकारी दिए ।
उनका अनुसार विवादपछि कारागार परिसरको सुरक्षा व्यवस्था कडा पारिएको छ । एसपी खत्रीले कैदीबन्दीबीच विवाद किन र कसरी उत्पन्न भयो भन्ने विषयमा अनुसन्धान भइरहेको बताए ।
हालसम्म विवादको स्पष्ट कारण खुल्न नसकेको जनाउँदै घटनाबारे विस्तृत विवरण संकलन गर्ने काम जारी रहेको उनले बताए ।
स्थिति नियन्त्रणमा रहेको र कुनै ठूलो अप्रिय घटना हुन नदिन सुरक्षा निकाय सतर्क अवस्थामा रहेको प्रहरीको भनाइ छ ।
