काठमाडौ, ४ पुष । उपत्यकाका विभिन्न स्पा, होटल तथा मनोरञ्जनस्थलबाट प्रहरीले आठ जना नाबालिका बालिकाको उद्धार गरेको छ ।
नाबालिकालाई यौनजन्य गतिविधि तथा जबर्जस्ती वेश्यावृत्तिमा संलग्न गराएको आरोपमा पाँच जनालाई पक्राउ गरिएको मानव बेचबिखन अनुसन्धान ब्यूरोले जनाएको छ ।
ब्यूरोका अनुसार गोप्य सूचनाका आधारमा गरिएको अनुसन्धानमा नाबालिकालाई आर्थिक प्रलोभन देखाएर तथा दबाब दिई स्पा, डान्सबार, क्लब, खाजाघर र गेष्टहाउसहरूमा यौनशोषणमा लगाइएको तथ्य खुलेपछि प्रहरीले छापा मारेको हो ।
छापाका क्रममा काठमाडौं ठमेलस्थित गोल्डेन स्पा, चावहिलको फायर लाउन्ज एण्ड क्लब, बौद्धको लक्की स्पा, मित्रनगरको सुदूरपश्चिम खाजाघर र खप्तड सुदूरपश्चिम गेष्टहाउसबाट आठ नाबालिकाको उद्धार गरिएको प्रहरीले जनाएको छ ।
पक्राउ पर्नेहरूमा काठमाडौं बूढानीलकण्ठ–१३ का ३२ वर्षीय हेमन्त श्रेष्ठ, सिन्धुली दुधौली–१२ की ४० वर्षीया गीताकुमारी आचार्य, सल्यान कुमाख–४ का ४५ वर्षीय गोविन्द बुढाथोकी, बझाङ छबिसपाथीभेरा–१ का ४२ वर्षीय हरिभक्त गिरी र कैलाली गौरीगङ्गा–६ का ४९ वर्षीय भीमबहादुर साउद रहेका छन् ।
मानव बेचबिखन अनुसन्धान ब्यूरोका प्रवक्ता प्रहरी उपरीक्षक विश्वराज खड्काका अनुसार उद्धार गरिएका बालिकालाई आवश्यक संरक्षण र पुनस्र्थापनाका लागि सम्बन्धित निकायमा पठाइएको छ भने पक्राउ परेकामाथि मानव बेचबिखन तथा यौनशोषणसम्बन्धी कसुरमा थप अनुसन्धान भइरहेको छ ।
