काठमाडौँ, ४ पोष । भौतिक पूर्वाधार तथा यातायात मन्त्रालयको आन्तरिक अध्ययन समितिले इम्बोस्ड नम्बर प्लेटको शुल्क अस्वाभाविक रूपमा महँगो भएको निष्कर्ष निकालेका छन् ।
समितिले हालको मूल्य संरचना वैज्ञानिक नभएको भन्दै शुल्क घटाउन सरकारलाई सुझाव दिएको छ ।.सहसचिव कृष्णराज पन्थको संयोजकत्वमा गठित समितिका अनुसार नम्बर प्लेटको उत्पादन लागतसँगै आरएफआईडी गेट, सफ्टवेयर, कन्ट्रोल रुमलगायत पूर्वाधारको खर्च र नाफा समेत सेवाग्राहीबाट असुलिँदा मूल्य बढेको हो ।
समितिले यस्ता पूर्वाधार राज्यले निर्माण गर्नुपर्ने र सेवाग्राहीबाट प्लेटको लागत मात्र लिनुपर्ने सुझाव दिएको छ । अध्ययनअनुसार इम्बोस्ड नम्बर प्लेटको उत्पादन लागत प्रतिप्लेट करिब १२ अमेरिकी डलर पर्छ ।
तर यातायात व्यवस्था विभागले सवारीको प्रकारअनुसार २ हजार ५०० देखि ३ हजार ६०० रुपैयाँसम्म शुल्क तोकेको छ । इम्बोस्ड नम्बर प्लेटमा अंग्रेजी भाषा प्रयोगको विषयमा पनि विरोध रहेकाले समितिले जनगुनासो सम्बोधन गर्नुपर्ने आवश्यकता औँल्याएको छ ।
तर हालको ठेक्का सम्झौता अंग्रेजीमै भएकाले तत्काल भाषा परिवर्तन गर्न नसकिने समितिको भनाइ छ । समितिले विगतका ठेक्का सम्झौतामा कमजोरी रहेको उल्लेख गर्दै भविष्यमा सुधारसहित अघि बढ्न सुझाव दिएको छ । तयार प्रतिवेदन मन्त्रीलाई बुझाउन बाँकी रहेको र त्यसपछि कार्यान्वयन प्रक्रिया अघि बढाइने मन्त्रालयले जनाएको छ ।
