काठमाडौं, १ पुस । नेकपा एमालेले ११औँ राष्ट्रिय महाधिवेशनमा नेतृत्व चयनका लागि विद्युतीय भोटिङ प्रणाली प्रयोग गर्ने भएको छ ।
भृकुटीमण्डपस्थित निर्वाचन केन्द्रमा ८० वटा विद्युतीय भोटिङ मेसिन जडान गरी बुथ तयार गरिएको छ । एमाले केन्द्रीय निर्वाचन आयोगका अध्यक्ष डा. विजय सुब्बाका अनुसार १०० मेसिन ल्याइए पनि ८० प्रयोग गरिनेछ भने बाँकी नमूना अभ्यास र अतिरिक्तका लागि राखिएको छ ।
निर्वाचनमा २ हजार २६३ प्रतिनिधि सहभागी हुँदैछन् र एक मतदातालाई मतदान गर्न करिब २५–३० मिनेट लाग्ने अनुमान गरिएको छ ।
मंगलबार दिउँसो १२ बजेदेखि मतदान तोकिए पनि प्राविधिक तयारी जारी रहेकाले राति ८ बजेपछि मात्र मतदान सुरु हुने प्राविधिक लक्ष्मण रिमालले जानकारी दिएका छन् ।
हाल उम्मेदवारको नाम मिलाउने र फोटो कोडिङको काम भइरहेको छ । एमालेको नयाँ नेतृत्वका लागि केपी शर्मा ओली र ईश्वर पोखरेल प्यानलसहित प्रतिस्पर्धामा छन् भने केही उम्मेदवारहरू स्वतन्त्र रूपमा मैदानमा छन् ।
