जनकपुर, १ पुस । जिल्ला प्रहरी कार्यालय धनुषाले उत्कृष्ट कार्यसम्पादन गर्दै अपराध नियन्त्रण र अनुसन्धानमा उल्लेखनीय योगदान पु¥याएको भन्दै प्रहरी बरिष्ठ नायव निरीक्षक (प्र.ब.ना.नि.) सागर शम्सेर जबरालाई २०८२ साल मंसिर महिनाको ‘पुलिस अफ द मन्थ’ घोषणा गरेको छ ।
अपराध नियन्त्रण तथा अनुसन्धान शाखाको दरबन्दी भई हाल प्रहरी चौकी जनकपुरमा कार्यरत प्र.ब.ना.नि. जबराले गम्भीर प्रकृतिका अपराध अनुसन्धान, फरार अभियुक्तको खोजी तथा पक्राउमा सक्रिय, प्रभावकारी र परिणाममुखी भूमिका निर्वाह गरेको जिल्ला प्रहरी कार्यालय धनुषाले जनाएको छ ।
मिति २०८२÷०७÷२८ गते मिथिला बिहारी नगरपालिका–९, अन्दुपट्टी८८मा वडा अध्यक्ष बिन्देश्वर यादवमाथि गोली प्रहार गरी हत्या गरिएको घटनामा संलग्न १२ जनामध्ये चार जनालाई पक्राउ गर्न उनले महत्वपूर्ण योगदान दिएका थिए ।
उक्त घटनाको अनुसन्धानमा उनको सक्रियताले अपराध अनुसन्धानलाई निर्णायक मोडमा पु¥याएको प्रहरीको भनाइ छ । त्यसैगरी, जनकपुर उपमहानगरपालिका–११ मा घटेको जबरजस्ती करणीसम्बन्धी घटनामा संलग्न अभियुक्तहरूलाई विभिन्न स्थानबाट पक्राउ गर्न उनले प्रभावकारी नेतृत्व र समन्वय गरेका थिए ।
साथै, जनकपुर–१० स्थित एक होटलमा घटेको नाबालिकासम्बन्धी गम्भीर अपराधमा संलग्न फरार प्रतिवादीहरूलाई समेत सक्रिय अनुसन्धानमार्फत पक्राउ गर्न सहयोग पु¥याएका छन् । यसका अतिरिक्त, २०८२ सालको राम–सीता विवाह पञ्चमी मेलाका क्रममा शान्ति–सुरक्षा व्यवस्थापनमा उनले खेलेको भूमिकालाई पनि प्रहरी कार्यालयले प्रशंसनीय ठहर गरेको छ । 
मेलाको अवधिभर कुनै पनि अप्रिय घटना हुन नदिन सुरक्षा व्यवस्था सुदृढ बनाउँदै जनशान्ति कायम राख्न उनले अहम भूमिका निर्वाह गरेका थिए ।
आफूलाई सुम्पिएको जिम्मेवारी उच्च व्यवसायिकता, इमान्दारिता र कुशलताका साथ निर्वाह गर्दै प्रहरी संगठनको छवि उकास्न उल्लेखनीय योगदान पु¥याएको निष्कर्षसहित जिल्ला प्रहरी कार्यालय धनुषाले उनलाई ‘पुलिस अफ द मन्थ’ घोषणा गरेको हो ।
जिल्ला प्रहरी कार्यालय धनुषाका प्रमुख प्रहरी उपरीक्षक रुगम बहादुर कुँवरले प्र.ब.ना.नि. जबराको उत्कृष्ट कार्यले आम नागरिकमा प्रहरीप्रतिको विश्वास र सकारात्मक सोच अभिवृद्धि भएको बताएका छन् ।
उनले आगामी दिनमा पनि यस्तै उदाहरणीय कार्यले समाजमा शान्ति, सुरक्षा र न्यायको अनुभूति गराउने विश्वास व्यक्त गरे ।
