काठमाडौं, १ पुस । पाँचौँ राष्ट्रिय बाघ गणना आजदेखि चितवन, पर्सा, बाँके, बर्दिया, शुक्लाफाँटा र लालझाडी करिडोरमा सुरु भएको छ ।
वैज्ञानिक विधिअनुसार ३ ब्लकमा २३ सय स्वचालित क्यामरा प्रयोग गरी ८ हजार ४ सय वर्ग किलोमिटर क्षेत्रभित्र बाघको संख्या, बासस्थान र आहाराको अध्ययन गरिनेछ ।
राष्ट्रिय निकुञ्ज तथा वन्यजन्तु संरक्षण विभागको संयोजनमा करिब २ सय ५० दक्ष जनशक्ति खटिएका छन् । गणना चैतसम्म चल्नेछ भने यसको नतिजा सन् २०२६ जुलाई २९ मा विश्व बाघ दिवसका दिन सार्वजनिक गरिनेछ ।
सन् २०२२ को गणनामा नेपालमा ३ सय ५५ बाघ रहेका थिए ।
