काठमाडौं, २९ मंसिर । भिजिट भिसा प्रकरणमा संलग्न भएको आशंकामा जिल्ला प्रशासन कार्यालय म्याग्दीका प्रमुख जिल्ला अधिकारी (सीडीओ) बद्रि तिवारीलाई गृह मन्त्रालय तानिएका छन् ।
अख्तियार दुरुपयोग अनुसन्धान आयोगले तिवारीसहित केही व्यक्तिमाथि अनुसन्धान भइरहेको जानकारी दिएपछि उनको जिम्मेवारीबाट हटाउँदै मन्त्रालयमा बोलाइएको हो । गृह मन्त्रालयको अनुसार तिवारीलाई मन्त्रालयको अतिरिक्त समूह (जगेडा) मा राखिएको छ ।
तिवारीलाई मन्त्रालय तानिएपछि म्याग्दीको प्रमुख जिल्ला अधिकारीका रूपमा रवीन्द्र आचार्यलाई खटाइएका छन् । आचार्य हाल गृह मन्त्रालयको शान्ति सुरक्षा महाशाखामा कार्यरत उपसचिव हुन् ।
तिवारी यसअघि तत्कालीन गृहमन्त्री रमेश लेखकको कार्यकालमा निजी सचिवका रूपमा कार्यरत थिए । केही दिनअघि विशेष अदालतमा दायर भएको भिजिट भिसा प्रकरणसम्बन्धी मुद्दामा लेखकसहित तिवारीलगायतका व्यक्तिमाथि पनि छानबिन भइरहेको अख्तियारले जनाए ।
