तनहुँ, २९ मंसिर । तनहुँको व्यास नगरपालिका–५ अन्तर्गत पर्ने माथिल्लो पाटनस्थित मादी नदीको किनारमा एक महिलाको शव बेवारिसे अवस्थामा फेला परेको छ ।
सोमबार बिहान स्थानीयवासीले नदी किनारमा शव देखेपछि प्रहरीलाई खबर गरेका थिए । जिल्ला प्रहरी कार्यालय तनहुँका अनुसार पानीमा कोल्टो परेको अवस्थामा नाम, थर र वतन नखुलेको महिलाको शव फेला परेको हो ।
मृतक महिलाको उमेर अन्दाजी ४० देखि ४५ वर्षको बीचमा रहेको प्रहरीको अनुमान छ । घटनाको जानकारी प्राप्त हुनासाथ प्रहरी निरीक्षक शिवप्रसाद पाठकको नेतृत्वमा प्रहरी टोली घटनास्थलमा खटिएको थियो ।
प्रारम्भिक अनुसन्धानमा शव केही समयदेखि पानीमा रहेको हुनसक्ने अनुमान गरिएको छ । शवको पहिचान खुल्न नसकेको र घटनाको कारणसमेत स्पष्ट नभएकाले थप अनुसन्धान भइरहेको जिल्ला प्रहरी कार्यालय तनहुँका प्रहरी नायब उपरीक्षक श्रवणकुमार विकले जानकारी दिए ।
प्रहरीले शवलाई पोष्टमार्टमका लागि अस्पताल पठाउने तयारी गरिरहेको छ भने मृतकको पहिचान खुलाउन आसपासका प्रहरी कार्यालयसँग समन्वय तथा स्थानीयस्तरमा जानकारी संकलन गरिरहेको जनाएको छ ।
