काठमाडौं, २८ मंसिर । नेपालका लागि भारतीय राजदूत नवीन श्रीवास्तवको स्वास्थ्य अवस्था क्रमशः सुधार हुँदै गएको उपचारमा संलग्न चिकित्सकहरूले बताएको छ ।
काठमाडौंको चम्पादेवी डाँडामा हाइकिङ गर्ने क्रममा राजदूत श्रीवास्तवलाई छातीमा तीव्र दुखाइ महसुस भएको थियो । अवस्था गम्भीर बन्दै गएपछि उनलाई नेपाली सेनाको हेलिकप्टरमार्फत उद्धार गरी ग्रान्डी इन्टरनेसनल अस्पताल लगिएको थियो ।
चिकित्सकका अनुसार दिउँसो करिब १ः३० बजे छाती दुखाइ सुरु भएको थियो । अपराह्न ४ बजे अस्पताल पु¥याइएको हो । प्रारम्भिक उपचार तथा परीक्षणपछि उनलाई हृदयघात भएको पुष्टि भएको थियो ।
मुटुको देब्रे नशामा अवरोध देखिएपछि तत्काल एन्जियोग्राफी गरी अवरुद्ध नशामा स्टेन्ट राखिएको चिकित्सकले जानकारी दिएको छ । अस्पतालका अनुसार राजदूत श्रीवास्तव होसमा नै अस्पताल आइपुगेका थियो ।
तत्काल उपचारका क्रममा मुटुको ब्लक भएको नशा खोलिएको र हाल उनको अवस्था स्थिर बन्दै गएको छ । हाल उनी अस्पतालको आईसीयूमा चिकित्सकको निगरानीमा उपचाररत छन् । स्वास्थ्य अवस्था सन्तोषजनक रूपमा सुधारोन्मुख रहेकाले केही दिन आईसीयूमा राखेर निगरानी गरिने चिकित्सकले बताए ।
