काठमाडौं, २८ मंसिर। नेकपा एमालेको ११औँ महाधिवेशनअन्तर्गतको बन्दसत्र पुनः सरेको छ।
बिहानै सुरु गर्ने भनिएको बन्दसत्र सवा १२ बजेका लागि तोकिएपछि फेरि दिउँसो १ बजेका लागि सारिएको हो।
भक्तपुरको सल्लाघारीमा उद्घाटन भएको महाधिवेशनको बन्दसत्र काठमाडौंको भृकुटीमण्डपमा हुँदैछ।
बन्दसत्रअघि अहिले केन्द्रीय कमिटीको कार्यकालको अन्तिम बैठक बस्ने तयारी भइरहेको छ। बैठकमा पार्टी विधान संशोधन, समसामयिक राजनीतिक अवस्था तथा बन्दसत्रका कार्यक्रमबारे महत्वपूर्ण छलफल हुने नेता महेश बस्नेतले जानकारी दिएका छन्।
बन्दसत्र सरे पनि प्रतिनिधिहरू बिहानैदेखि भृकुटीमण्डपमा उपस्थित भई विभिन्न दस्तावेजहरूको अध्ययन तथा छलफलमा जुटिरहेका छन्।
